കേരളത്തിലെ ഏറ്റവും വലുതും ശക്തവുമായ അധ്യാപക സംഘടനയായ കേരള സ്ക്കൂള്‍ ടീച്ചേര്‍സ് അസോസിയേഷന് കേരള ചരിത്രത്തില്‍ സുപ്രധാന സ്ഥാനമാണ് ഉള്ളത്. സാമ്രാജ്യ ത്വത്തിനെതിരെയും ജന്മിത്തത്തിനെതിരെയും സംഘടന എക്കാലവും ശബ്ദമുയര്‍ത്തിയിട്ടുണ്ട്. അധ്യാപക സമൂഹത്തിന്റെ അഭിമാനം കാക്കുന്നതിന് കെ എസ് ടി എ തനിച്ച് നടത്തിയ പോരാട്ടങ്ങള്‍ നിരവധിയാണ്. സ്വകാര്യ മാനേജര്‍മാരുടെ ധിക്കാരപരമായ സമീപനങ്ങളെ സംഘടന ചെറുത്ത് തോല്‍പിച്ചിട്ടുണ്ട്. പൊതു വിദ്യാഭ്യാസം സംരക്ഷിക്കുന്നതിന് കെ എസ് ടി എ നടത്തിയ ഉജ്വലമായ സമരങ്ങള്‍ക്ക് കേരളത്തിലെ ട്രേഡ് യൂണിയന്‍ സമര ചരിത്രത്തില്‍ ഐതിഹാസികമായ സ്ഥാനമാണ് നേടിക്കൊടുത്തിട്ടുള്ളത്.ആയിരത്തി തൊള്ളായിരത്തി മുപ്പതുകളിലാണ് സംഘടന രൂപീകൃതമായത്. എന്നാൽ കെ എസ് ടി എ എന്ന പേരിലറിയപ്പെടാൻ തുടങ്ങിയത് ആയിരത്തി തൊള്ളായിരത്തി തൊണ്ണൂറ്റി ഒന്നു മുതലാണ്. അതിനു മുമ്പ് കേരള പ്രൈവറ്റ് ടീച്ചേർസ് യൂണിയൻ അഥവാ കെ പി ടി യു എന്ന സംഘടനയായും കേരള ഗവൺമെന്റ് ടീച്ചേർസ് അസോസിയേഷൻ അഥവാ കെ ജി ടി എ എന്ന സംഘടനയായും അധ്യാപക പ്രസ്ഥാനങ്ങൾ നിലകൊണ്ടു. ഇന്ന് ഗവൺമെന്റെന്നോ എയിഡഡെന്നോ വ്യത്യാസമില്ലാതെ പ്രീ പ്രൈമറി മുതൽ ഹയർസെക്കന്ററി വരെയുള്ള മുഴുവൻ അധ്യാപകരെയും കാറ്റഗറി വികാരമില്ലാതെ ഉൾക്കൊള്ളുന്ന സംഘടനയാണ് കെ എസ് ടി എ.